រាងកាយនឹងទទួលរងផលប៉ះពាល់ធ្ងន់ធ្ងរ ប្រសិនបើអ្នកចូលចិត្តញ៉ាំរបស់ផ្អែម និងហតដកច្រើនពេក

សម្រាប់ការហូបចុកប្រចាំថ្ងៃ មនុស្សគ្រប់គ្នាប្រាកដជាចង់ញ៉ាំអ្វីដែលខ្លួនចូលចិត្ត ដើម្បីឲ្យឆ្ងាញ់មាត់ និងមានអារម្មណ៍ល្អ។ យ៉ាងណាក៏ដោយ មានប្រភេទអាហារមួយចំនួន ដែលអ្នកគួរចៀសវាង ឬកាត់បន្ថយនៅក្នុងកម្រិតតិចបំផុត ពុំដូច្នោះទេវាសុខភាព ក៏ដូចជារាងកាយរបស់អ្នកនឹងទទួលរងផលប៉ះពាល់បន្តិចម្តងៗ ពីមួយថ្ងៃទៅមួយថ្ងៃ រហូតធ្លាក់ដល់កម្រិតធ្ងន់ធ្ងរ នាថ្ងៃអនាគត។

ហតដក

តាមការសិក្សាស្រាវជ្រាវបានបង្ហាញថា ហតដកមានផ្ទុកសូដ្យូមចំនួន ៦០០មីលីក្រាម​ដែលជាបរិមាណ ស្មើនឹងពាក់កណ្តាលនៃកម្រិតជាតិអំបិលដែលត្រូវប្រើប្រាស់ប្រចាំថ្ងៃ។ ដរាបណាអ្នកញ៉ាំវាក្នុងកម្រិតច្រើន មានន័យថាអ្នកកំពុងតែស្រូបយកជាតិអំបិលលើសកម្រិតសម្រាប់រាងកាយ ជាហេតុបង្កផលប៉ះពាល់ចំពោះសុខភាពដូចជា ជំងឺសរសៃបេះដូងជាដើម មិនតែប៉ុណ្ណោះកម្រិតជាតិអំបិលខ្ពស់ ធ្វើឲ្យរាងកាយបាត់បង់ជាតិទឹក បណ្តាលឲ្យមានសភាពហើម។ ម្យ៉ាងវិញទៀត ក្នុងហតដក ១ខាំ មានចំនួនកាឡូរីរហូតដល់ទៅ ២៩០ និងជាតិធាត់ ២៦ក្រាម ធ្វើឲ្យរាងកាយមានហានិភ័យខ្ពស់ក្នុងការប្រឈមជាមួយនឹងជំងឺផ្សេងៗដូចជា លើសទម្ងន់ លើសឈាម...។

ភេសជ្ជៈដែលមានជាតិផ្អែម

យោងតាមការសិក្សាស្រាវជ្រាវពីសកលវិទ្យាល័យវេជ្ជសាស្ត្រ Havard បានអះអាងថា ប្រសិនបើអ្នកចូលចិត្តផឹកភេសជ្ជៈកំប៉ុង ដែលមានជាតិផ្អែមខ្លាំងជារៀងរាល់ថ្ងៃ នោះអ្នកនឹងប្រឈមជាមួយបញ្ហាលើសទម្ងន់ និងប្រឈមនឹងជំងឺទឹកនោមផ្អែម ដល់ទៅ២៦% បើប្រៀបធៀបទៅនឹងអ្នកដែលផឹកម្តងក្នុងមួយខែ។ លើសពីនេះទៅទៀត នៅពេលដែលផឹកភេសជ្ជៈទាំងនោះ វាក៏អាចបង្កផលប៉ះពាល់ទៅដល់ឆ្អឹង សន្លាក់ ដោយសារវានឹងកាត់បន្ថយដង់ស៊ីតេរ៉ែក្នុងឆ្អឹង និងបង្កឱ្យមានជំងឺពុកឆ្អឹងទៅថ្ងៃមុខ៕